Artist
Ingrid Sørheim
Ingrid Sørheim er frilans folkemusikar og pedagog på durspel. Ho er kjent for å fengsla publikum med sitt lyriske spel, sterke forteljarglede og varme utstråling. Det kriblar i både lattermuskelen, tårekanalane og dansefoten når ho står på scena.
Ingrid har master i utøvande tradisjonsmusikk frå Norges Musikkhøgskole og bachelor frå Ole Bull Akademiet, der ho har fordjupa seg i heimtradisjonen frå Kvam i Hardanger. I 2018/2019 var ho på utveksling i Newcastle i Storbritannia og forelska seg i den keltiske toradarmusikken. Med ein forkjærleik for lydarslåttar, lystige springarar, seige rullar og engelske jigs har ho spesialisert seg på å overføra hardingfele- og feleslåttar til durspelet.
Ingrid har lang røynsle som både soloutøvar, pedagog, dansespelar og ensemblemusikar, og speler i mange ulike musikalske konstellasjonar. I 2025 spelte på ho Folkelarm med Nortopia, som gav debutalbumet i 2026. Ho er også aktiv med Vesterveg og med Veijr som i 2024 gav ut debutalbumet "Draumen". Ho er ein ettertrakta instruktør og konsertspelar i heile Sør-Noreg.
Ingrid hevdar seg i toppen durspelklassa på Landskappleiken med tre andreplassar på rad (2025, 2024 og 2023) og har fleire sigrar frå lokale og regionale tevlingar. I 2026 vann ho durspelklassa på Vinterkappleiken med 90 poeng, høgast poengsum for alle klassar.
Ho har motteke fleire prisar og stipend, mellom anna Harald Bu Rekrutteringsspris med Steinar Odde og Siri Nordgård (2022), Folkemusikk Ung Stipend (2025 og 2019), nominasjon til Fureprisen (2017) og Furestipendet (2014).
«Ingrid Sørheim klarer å trollbinda publikum med musikk og forteljarglede på ein måte få andre kan skilta med.» - Randi Jåstad, leiar i Kvam Mållag
“Ingrid Sørheim er ein framifrå utøvar og pedagog. Samstundes er ho også musikalsk tospråkleg, då interessa for keltisk musikk har resultert i studiopphald i England. Dette er med på å komplettere ein av dei beste yngre utøvarane på durspel i Noreg i dag.” - Jo Asgeir Lie, rektor på Ole Bull Akademiet